Victory Venkatesh and Energetic Star Ram Big Multistar Movie progress in final schedule

పాలు తాగనని మారాం చేసే పిల్లల సైతం అతని పేరు చెబితే టక్కున పాటు తాగేస్తారు. ఆ ఊళ్లో అతనంటే అంత భయం. ఆ పరిసరాల్లో అతనో శాసనకర్త. పూర్తిగా అర్ధంకాని వారికి మాత్రం అతనో దాదా. ఆ దాదాగారి వద్ద ఉద్యోగరీత్యా చేరతాడో కుర్రాడు. ఊహించని విధంగా ఆ దాదాగారి చెల్లెల్నే పటాయిస్తాడు. మరి ఆ అమ్మాయిని ఎలా పెళ్లాడాడు? అనే ఆసక్తికరమైన కథాంశంతో బాలీవుడ్‌లో వచ్చిన సినిమా ‘బోల్ బచ్చన్’. 

ఈ కథను తెలుగులో రీమేక్ చేస్తున్నారు నిర్మాత ‘స్రవంతి’ రవికిషోర్. బాలీవుడ్‌లో అజయ్‌దేవగన్, అభిషేక్‌బచ్చన్ పోషించిన పాత్రలను తెలుగులో వెంకటేష్, రామ్ పోషిస్తున్నారు. స్వయంవరం, నువ్వేకావాలి, నువ్వు నాకు నచ్చావ్, మల్లీశ్వరి, ప్రేమకావాలి వంటి విజయవంతమైన చిత్రాలను తెరకెక్కించిన కె.విజయభాస్కర్ దర్శకత్వంలో ఈ చిత్రం రూపొందుతోంది. ‘సీతమ్మవాకిట్లో సిరిమల్లెచెట్టు’, ‘ఎవడు’ చిత్రాల తర్వాత రానున్న భారీ మల్టీస్టారర్ మూవీ ఇదే కావడం గమనార్హం. 

ప్రస్తుతం ఆర్‌ఎఫ్‌సీలో ఈ చిత్రానికి సంబంధించిన భారీ పోరాట సన్నివేశాలను రామ్‌లక్ష్మణ్ నేతృత్వంలో తెరకెక్కిస్తున్నారు. దీంతో షూటింగ్ దాదాపు పూర్తవుతుందని వినికిడి. వెంకటేష్, రామ్ పోటీపడి నటిస్తున్నారని, బాలీవుడ్ సినిమా కంటే చాలా బెటర్‌గా విజయభాస్కర్ ఈ చిత్రాన్ని తీర్చిదిద్దుతున్నారని యూనిట్‌వర్గాల సమాచారం. ఈ చిత్రానికి ‘గోల్‌మాల్’ అనే టైటిల్ ప్రస్తుతం ప్రచారంలో ఉంది. ఆగస్ట్‌లో సినిమాను విడుదల చేయడానికి నిర్మాత సన్నాహాలు చేస్తున్నారు. అంజలి, షాజన్ పదంసీ ఇందులో కథానాయికలుగా నటిస్తున్న విషయం తెలిసిందే